អត្ថបទ​ល្អ​ៗ

អត្ថបទដកស្រង់ល្អៗចែកគ្នាអានពេលព្រឹក៖
-------------------------------------
មានបុរស់ស្រុកស្រែ​២នាក់​ នាំគ្នាទៅរកការងារធ្វើនៅទីក្រុង។ ម្នាក់តាំងចិត្តទៅទីក្រុងខាងជើង​ ឯម្នាក់ទៀតចង់ទៅទីក្រុងខាត្បូង។ នៅពេលអ្នកទាំង២កំពុងអង្គុយចាំរថភ្លើង​ ស្រាប់តែអ្នកដំណើរនាំគ្នាជជែកពីរឿងរ៉ាវរបស់ទីក្រុងទាំងពីរ​ដែលពួកគេនឹងទៅនោះ​។ គេនាំគ្នានិយាយថា​ នៅភាគខាងត្បូងសម្បូរមនុស្សឈ្លាសវៃពូកែរកសុីណាស់​ សូម្បីតែអ្នកដំណើរសួរផ្លូវក៏ទារលុយដែរ។ ចំណែកឯនៅភាគខាងជើងវិញ​ សំបូរមនុស្សស្លូតត្រង់​ចិត្តល្អ​ បើសិនជាគេឃើញអ្នកណាក្រីក្រគ្មានបាយហូប​ ពួកគេក៏យកម្ហូបអាហារ​ ឬយកសម្លៀកបំពាក់មកអោយជាដើម។

បុរស់ទី១​ ដែលពីមុនតាំងចិត្តទៅទិសខាងត្បូង​ បានលឺគេនិយាយដូច្នោះ​ ក៏គិតប្តូរចិត្តទៅទិសខាងជើងវិញម្តងប្រសើរជាង​ ទោះជារកលុយមិនបានក៏មិនដល់ថ្នាក់អត់ឃ្លានស្លាប់ដែរ​ គេគិតក្នុងចិត្តថា សំណាងហើយរថភ្លើងមិនទាន់ចេញ​ កុំអីដូចជាទៅស្លាប់ចោលឆ្អឹងនៅឋាននរកមិនខាន។

ឯបុរស់ទី២​ ដែលធ្លាប់តាំងចិត្តទៅទិសខាងជើងបានលឺដូចគ្នាដែរ​បែជាគិតផ្សេងទៅវិញ​ អ៉ើអញគួរតែទៅរកសុីនៅទិញខាងត្បូងវិញប្រសើរជាង​ បើគ្រាន់តែប្រាប់ផ្លូវទៅអ្នកដទៃក៏អាចរកលុយបានទៅហើយនោះ​ តើមានរឿងអីថាយើងរកលុយមិនបាន​ សំណាងហើយរថភ្លើងមិនទាន់ចេញ​ បើមិនអញ្ចឹងទេច្បាស់ជាបាត់បង់ឱកាស់ល្អនេះមិនខានឡើយ។ នៅពេលម្នាក់គិតហើយដឹងរឿងគ្នាទៅវិញទៅមក​ ពួកគេក៏ប្តូរសំបុត្ររថភ្លើងគ្នាក្នុងពេលនោះតែម្តងទៅ។

បុរស់ដែលប្តូរទៅទិសខាងជើង​ ទៅដល់ក៏ប្រទះឃើញថា​ល្អដូចជាគេនិយាយមែន។ ថ្ងៃដំបូងទៅដល់គេមិនបានធ្វើការអ្វីសោះ​ តែក៏មិនដែលអត់បាយមួយពេលណាដែរ​ មិនត្រឹមតែនៅតាមធនាគារមានទឹកអោយផឹកហ្រ្វីៗនោះទេ​ នៅតាមភោគជ្ជនីដ្ឋានក៏មានអាហារត្រៀបត្រាដាក់ទាក់ទាញអោយភ្ញៀវភ្លក់ទទេជាច្រើនកន្លែងផងដែរ​ បុរសម្នាក់នោះគិតថាវាជាទីកន្លែងសុខសាន្តរបស់គាត់ហើយ។

ចំណែកបុរស់ដែលប្តូរសំបុត្រទៅទិសខាងត្បូង​វិញក៏ប្រទះឃើញថា​ ក្រុងនេះគឺមានផ្លូវរកសុីច្រើនមែន​ មិនថាធ្វើអ្វីក៏សុទ្ធជាលុយកាក់ទាំងអស់។ ធ្វើជាអ្នកនាំផ្លូវក៏អាចរកលុយបាន​ បើកបន្ទប់ទឹកសាធារណះក៏អាចរកលុយបាន​ រកអាងទឹកមួយទុកអោយមនុស្សលុបមុខក៏អាចរកលុយបានដែរ​ អោយតែចេះប្រើខួរក្បាលគិតហើយចុះកម្លាំងបន្តិចបន្ទួចគឺរកលុយបានហើយ។ ដោយសារតែខ្លួនជាអ្នកស្រុកស្រែយល់ដឹងពីប្រភេទដីច្បាស់លាស់​ ដល់ថ្ងៃទី២​ គេទៅរកដីនៅការដ្ឋានសំណង់លាយជាមួយខ្សាច់​ ច្របល់ជាមួយស្លឹកឈើ​ ហើយច្រកថង់ធ្វើជាដីសម្រាប់ដាំផ្កា​រ​ ហើយដឹកជញ្ជូនទៅដល់ស្រ្តីមេផ្ទះដែលចូលចិត្តដាំផ្ការតែមិនយល់ពីស្ថានភាពដី។ បុរស់ទី​២​ រត់ចុះរត់ឡើងតែប៉ុន្មានត្រឡប់ក្នុងមួយថ្ងៃគេក៏អាចរកប្រាក់បានច្រើនគួរសមដែរ។

១ឆ្នាំក្រោយមក​ គេបានដើរសង្កេតមើលនៅតាមហាងទំនិញនានា​ បានឃើញស្លាកឃោសនាជាច្រើនដែលមានសភាពកខ្វក់​ គេក៏សើបសួរទើបដឹងថាក្រុមហ៊ុនសំអាតគេសម្អាតតែអាគារមិនសំអាតស្លាកឃោសនាទេ។ មិនបង្អង់យូរ​ គេក៏ទៅទិញជណ្តើរ​ ធុងទឹកនិងកន្សែងដើម្បីសុីឈ្នួលសម្អាតស្លាក់ឃោសនា​ បន្ទាប់មកគេបានបើកជាក្រុមហ៊ុនតូចមួយទទួលសម្អាតស្លាកឃោសនា​ដែលមានបុក្ខលិកប្រមាណជា​ ២០០នាក់។ មុខរបរនេះបានពង្រីកទៅដល់ទីក្រុងក្បែរៗនោះផងដែរ​ ហើយគេបានក្លាយទៅជាម្ចាស់អាជីវកម្មដ៏ធំមួយ។ ប៉ុន្មានឆ្នាំក្រោយមក​ គេបានជិះរថភ្លើងទៅទីក្រុងខាងជើងដើម្បីរកមើលថាតើខ្លួនអាចពង្រីកការងារនៅទីនោះបានដែរឬទេ?

នៅស្ថានីយ៏រថភ្លើងខណះពេលដែលគាត់បោះកំប៉ុងភេសជ្ជះដែលគាត់ផឹកអស់​ទៅក្នុងធុងសម្រាម​ ស្រាប់តែមានដៃមួយលូកមកចាប់សុំកំប៉ុងរបស់គាត់។ នៅពេលដែលគាត់កំពុងហុចកំប៉ុងអោយ​ បុរស់ទាំង២ក្រលេចឃើញមុខគ្នាក៏បើកភ្នែកធំៗដាក់គ្នា​ ម្នាក់ៗស្រឡាំងកាំង​ ព្រោះពួកគេទាំង២ជាបុរស់ដែលបានប្តូរសំបុត្ររថភ្លើងគ្នាកាលពី៥ឆ្នាំមុននោះឯង។
_______________________________________
នៅលើវិថីជីវិត​ ចំនុចដំបូងដែលចាប់ផ្តើមខុសគ្នា​ តែងតែធ្វើអោយឱកាសដែលគេរកឃើញខុសគ្នាតាមនឹងដែរ។ ឱកាសមានគ្រប់ទីកន្លែងសម្រាប់មនុស្សមានសកម្មភាពប្រឹងប្រែង​ មានបំណងប្រាថ្នា​ មានឧត្តមគតិពុះពារព្យាយាមស្វែងរកដោយគំនិតឆ្នៃប្រឌិត។ មនុស្សជំពូកនេះតែងតែឈ្លាសវៃក្នុងការស្វែងរកឱកាសដើម្បីកែប្រែឋាន:ជីវភាពរបស់គេអោយប្រសើរឡើងជានិច្ច។

ថ្វីត្បិតតែមានពាក្យថាលុយរត់រកមនុស្ស​ តែលុយមិនមែនចេះតែរត់រកមនុស្សគ្រប់គ្នានោះទេ​។ មនុស្សដែលចេះគិតមមៃរឿងឱកាសការងារ​ ទោះបីរត់តុតុ​ លក់អាហារតាមផ្លូវ​ ឬលក់ជជុះអនឡាញ​ក្តី​ គេក៏នឹងរមែងរកឃើញឱកាសនិងទីផ្សារជាបន្តបន្ទាប់។ តែមនុស្សដែលគិតមមៃតែរឿងសុំ​ គេក៏ចេះតែរឿងសុំអញ្ចឹងរហូតទៅ។

“មនុស្សភាគច្រើនតែងតែទម្លាក់កំហុសលើស្ថានភាពថា​បានមកកំណត់ជោកជាតារបស់ខ្លួនអោយទៅជាយ៉ាងនេះឬយ៉ាងនោះ​ តែអ្នកសម្រេចជោគជ័យលើលោកនេះ​ គឺអ្នកដែលក្រោកឈរដើរទៅរកស្ថានភាពដែលគេចង់បាន​ ឬបើសិនជារកមិនឃើញទេ​ ក៏គេនឹងបង្កើតវាឡើងដោយខ្លួនឯង”៕

#SHARE